05 November 2019

LARAB OKTUBRE 19, 2019 BALITA | Mga biktima han Yolanda kontra ha demolisyon

MAUNGOD NGA GIN-AATUHAN han mga kablas ha syudad han Tacloban nga biktima han bagyo nga Yolanda an ginlalarang nga iligal nga demolisyon han ira kabablayan

Nagtindog han barikada an mga residente ngan tagsuporta han Brgy. 2 Jones Extension ilarum han Yolanda Survivors Community Association Inc., (YSCAI) hadton Oktubre 18 agud pugngan an plano han lokal nga gubyerno nga iligal nga sakbon ngan panwakayon an porlomenos 30 nga balay. Antes hini, pira nga higamit han City Engineering Office para ha demolisyon an kinita ha palibot han UP Tacloban nga kasapit han nasering nga komunidad.

Una na nga nagpadara han pahimatngon han demolisyon an lokal nga gubyerno han Tacloban ha mga residente. Basar kuno ini ha usa nga memorandum han Department of Interior and Local Government (DILG) nga nagmamando nga tanggalon an mga pribado nga istruktura nga nakakaulang ha mga kalsada ngan sidewalk. Kundi ginkukwestiyon ini han mga residente tungod kay waray man ha kalsada o ha sidewalk an ira mga balay.

Sigon pa kan Norma Dicot, tagapangulo han YSCAI, waray katungod an lokal nga gubyerno han Tacloban nga magdumara han demolisyon tungod kay diri man nakatitulo an tuna ha ira kundi ha gubyerno han prubinsya han Leyte. Ginkumpirma ini han usa nga representante han Provincial Government of Leyte nga nakig-estorya ha mga residente han Brgy. 2 hadton Oktubre 11.

Iligal, waray ha proseso ngan diri makatawo an plano nga demolisyon. Luyo hini, pira kabeses nira nga ginkadto an upisina ni Mayor Alfred Romualdez agud makigsarabot, kundi tubtub yana waray la gihapon hiya umatubang ha ira.
Ginkakabarak-an han mga residente nga gamiton han gubyerno han Tacloban an palisiya han DILG agud tagan rason an mga plano nga demolisyon ha syudad sugad han Brgy. 37 reclamation area, Paseo, Anibong, ngan Rawis.

Hadton Marso, iligal nga ginpanruba an maabot ha 30 nga kabablayan ha Brgy. 6A Sto. Nino Extension, Jones Extension, Kassel ngan Anibong, komo kaparte han plano nga "pag-aayad" han syudad tungod ha panlasurbo han bagyo nga Yolanda hadton 2013. Kalakip hini nga plano an polisiya han No Dwelling Zone, an Tide Embankment Project ha kahilab-an han Leyte, ngan relokasyon han 40% han populasyon han Tacloban ngadto ha norte nga parte han syudad.

Kundi sigon ha grupo nga People Surge, gintatahuban han "rehabilitasyon" an tinuod nga katuyuanan han gubyerno han Tacloban nga palayason an mga residente agud tagan dalan an pagsakob han mga kapitalista nga mamruhunan ngan kompaniya ha konstraksyon.

Ginsuportahan naman an barikada han YSCAI han mga estudyante tikang ha UP Tacloban. Kalakip an unibersidad ha ginpipirit nga paiwason para ha "rehabilitasyon" han syudad. Kabulig han mga kablas ha syudad an mga estudyante ha pag-insister han ira katungod ha disente nga pabalay ngan pakabuhi, labina komo mga biktima han kalamidad ngan pagpapasibaya han gubyerno.

No comments:

Post a Comment