05 November 2019

LARAB OKTUBRE 19, 2019 BALITA | 2 nga sibilyan, bag-o nga biktima han EJK ha EV

DUHA NGA SIBILYAN ha Leyte an bag-o nga biktima han extrajudicial killing (EJK) o ekstrahudisyal nga panmatay ilarum han rehimen Duterte.

Ginpusil han mga waray makilal-i nga riding in tandem hi Maureen Japzon, tagapagtukod han National Union of Journalists of the Philippines ngan hadto anay Bulatlat contributor dapit alas-12:30 han kulop hadton Oktubre 15 hirani ha upisina han COMELEC ha Brgy. McArthur, Leyte kun diin nagtatrabaho an biktima.

Pito kabeses ginpusil an 42 anyos nga biktima samtang sakay han motorsiklo. Kilalado nga lider-aktibista han League of Filipino Students hi Japzon hadton ada pa hiya ha kolehiyo. Nagin miyembro liwat hiya han konseho han mga estudyante ha University of the Philippines Tacloban College. Kaupod han masa hi Japzon ha pagpapatalsik kan Joseph Estrada. Umato liwat hiya hadton panahon nga grabe an pamamasista ha Eastern Visayas han berdugo nga hi Maj. Gen. Jovito Palparan. Tikang hadto, hugot na nga ginbabantayan han militar hi Japzon.

Ha pareho nga adlaw, ginpatay liwat an usa nga sibilyan dapit alas-4 han kulop han Libungao, Kananga, Leyte. Ginkilala an biktima nga hi Renee Superior, usa nga konsehal ha ira baryo. Hugot nga ginkukundenar han Katungod Sinirangan Bisayas (Katungod-SB) an nagtikagrabe nga atake han rehimen Duterte ha rehiyon. Sigon ha Katungod SB, maabot 31 na an biktima han EJK ha EV hin igpatuman an Memorandum Order 32 han nakalabay nga tuig kun diin pito an upisyal han barangay ngan munisipyo nga aktibo nga nasuporta ha panawagan han mga parag-uma.

Sigon ha grupo, antes an deklarasyon han MO 32, grabe na an pananarhug ngan Red-tagging han militar ha mga progresibo nga grupo sugad han LFS, Karapatan ngan Bayan.

Gin-aaghat hini an ngatanan nga tagdepensa han tawhanon nga katungod ngan an katawhan nga magin mabinantayon ngan padayon nga ibuksas an mga panmatay ngan iba pa nga pangabuso han rehimen Duterte.

No comments:

Post a Comment