23 October 2019

LARAB OKTUBRE 5, 2019 BALITA | NDF-EV, nanawagan ha kabatan-unan nga isalikway an pasista nga oryentasyon

BALITA | NDF-EV, nanawagan ha kabatan-unan nga isalikway an pasista nga oryentasyon

GIN-AGHAT HAN NATIONAL Democratic Front-Eastern Visayas o NDF-EV hini nga Septyembre 30 an mga kabatan-unan nga isalikway an pasista nga oryentasyon ngan atuhan an natikagrabe nga militarisasyon ha mga kampus ilarum han pasista nga rehimen Duterte.

Kahuman ini han nahitabo nga hazing (pangastigo agud karawton) ha Philippine Military Academy kun diin namatay an kadete nga hi Darwin Dormitorio hadton Septyembre 18. Gintudlok han NDF-EV nga ha pareho nga adlaw, naglansar liwat han usa nga porum an 803rd Maneuver Company han Philippine National Police nga obligado nga tambungan han mga estudyante han University of Eastern Philippines ha Catarman, Northern Sa mar.

Ginsering ni Fr. Santiago Ka "Sanny" Salas, tagapagyakan han NDF-EV, nga nakagamot an hazing ha pasista nga oryentasyon han mga militar ngan pulis tungod kay ginhuhurma hira nga magin kontra-katawhan ngan kontra-demokratiko. An sugad nga pasista nga oryentasyon karuyag liwat ipatuman ha iba pa nga eskoylahan pinaagi han pagbalik han mandatory o obligado nga Reserved Officers Training Corps (ROTC) komo treyning militar, sugad man an piniritay nga pagpasunod pinaagi han pananalumpigos ha sakob han mga kampus.

Ginpananglitan ni Fr. Salas an UEP kun diin nagtutdo la han karat-an an pulis ha paghilo ha hunahuna han kabatan-unan hadton porum han Septyembre 18. Igindabi nira an mga sibilyan ngan progresibo nga organisasyon ha Bagong Hukbong Bayan ngan NDF ngan ginpakaraut an ira mga lehitimo nga panawagan. Gindayaw nira an kontra-druga nga kampanya, nga hiluagan nga ginkukundenar ha pagpatay ha masobra 30,000 nga kablasanon. Nagrekluta liwat hira ha police academy diri para ha kaupayan kundi para mas duma mo an mapatuman han Tokhang, Sauron nga iba pa nga operasyon nga panmatay ha mga kablas ngan naato ha tiraniya ni Duterte.

Dugang pa ni Fr. Salas, makanasud ngan demokratiko nga prinsipyo an igin-uundong han NPA samtang usa nga pasista nga oryentasyon han pagprotehir ha mga naghahadi nga klase an prinsipal nga buruhaton han AFP-PNP. Sanglit, gin-aghat liwat han NDF-EV an mga membro han AFP-PNP nga diri magin buta nga sunud-sunuran ngan magin kritikal ha mga institusyon nga ira gin-aapihan, adman an mga batakan nga problema han katilingban, ngan pamatian an mga panawagan han katawhan Pilipino.

No comments:

Post a Comment