23 October 2019

LARAB OKTUBRE 5, 2019 BALITA | Mga drayber ngan opereytor ha Eastern Visayas, nakiusa ha ukoy-pasadahan

BALITA | Mga drayber ngan opereytor ha Eastern Visayas, nakiusa ha ukoy-pasadahan

NAKIUSA AN MGA drayber ngan opereytor han dyip ha Eastern Visayas nga gindumara han Pinag-isang Samahan ng Tsuper at Operator Nationwide-Eastern Visayas (PISTON-EV) ha ginhimo nga ukoy pasada ha bug-os nga nasud hadton Septyembre 30.

Ginpangunahan han No To Jeepney Phase-Out Coalition, usa nga hilapad nga alyansa han mga drayber ngan opereytor, an ukoy pasada ha bug-os nga nasud para ipakita an ira pagtipa ha pagmonopolyo han rehimen Duterte ha pampubliko nga transportasyon.

Sigon ha PISTON-EV, haros ngatanan nga sektor ha bug-os nga nasud naglalaum ha pampubliko nga transportasyon kundi imbes aydon han reaksyunaryo nga gubyerno an serbisyo, naghihimo pa ini han mga pamaagi kun tiunan-o pagkakakitaan, sugad han pag-phase out (pagwara ha dayuday) ha mga dyip ngan babalyuan han mga solar ngan electric power vehicles. Hitaas an presyo han kada yunit han bag-o nga dyip nga karuyag igbalyo han rehimen Duterte nga dugang nga pakuri ha mga gudti nga opereytor ngan drayber. Labot pa hini, dugang nga pakuri liwat an hitaas nga presyo han gasolina nga magreresulta ha paghitaas liwat han pasahe.

Ginklaro han grupo nga karuyag liwat han mga drayber ngan opereytor an larang nga modernisasyon han pampubliko nga transportasyon kundi diri la haum ha kongkreto nga kundisyon han mga drayber ngan opereytor an pamaagi han pagpapatuman han reaksyunaryo nga gubyerno.

Sanglit, gin-aayat han PISTON-EV nga igpadayon an hugot nga pagkaurusa han ngatanan nga drayber, opereytor ngan katawhan Pilipino para ipanawagan an makatadungan ngan maupay nga serbisyo ha pampubliko nga transportasyon.

No comments:

Post a Comment