28 October 2019

LARAB OKTUBRE 12, 2019 BALITA | Las Navas 3, gindakop ngan gintortyur han 20th IB

ILIGAL NGA GINDAKOP ngan gintortyur han mga elemento han 20th Infantry Battalion an usa nga organisador han parag-uma nga hi Christian “Chanchan" Sabado ngan duha pa niya nga kaupod nga mga parag-uma nga hira Anton Manoso ngan Edson Piczon samtang tikadto hira ha Barangay San Francisco, Las Navas, Northern Samar.

Sigon han mga sayod, ginpadapa an tulo ngan gintamak-tamakan han mga sundalo. Mayda liwat mga residente nga nakakita ha trak kun diin nakasakay an ginkastigo ngan duguon nga lawas han mga biktima. Gintatahapan nga aada ha kustodiya han Northern Samar Police Provincial Office hira Sabado yana.

Samtang, nagpadara han ritrato ha dada ni Sabado kun diin duguon ngan may kapot hiya nga granada. Mayda liwat sumat han panarhug ngan harasment tikang ha militar an mga kag-anak han duha nga parag-uma kahuman kadtuon an ira balay han mga sundalo hadton gab-i han Oktubre 3.

Ha pahayag han Northern Samar Small Farmers Association, ginpakadto hi Sabado ha Las Navas para ha pangliskay hinuong ha padayon nga problema ha peste komo aparte han ira kampanya. Gin-ataman kaupay han asosasyon an pakig-estoryahay ha mga barangay nga kaparte han ira kampanya para maakomodar hi Sabado.

Dugang pa han NSSFA, maiha nga nagios hi Sabado para bumulig ha mga kablas. Nagtikang hiya komo organisado ha han-ay han kabatan-unan ngan gidaan nga miyembro han Anakbayan-Polytechnic University of the Philippines. Gumios liwat hiya ha han-ay han mga kablas nga tagasyudad ilarum han Kalipunan ng Damayang Mahihirap.

Ginpapanawagan han NSSFA ngan iba pa nga organisasyon sugad han Katungod
Sinirangan Bisayas, College Editors’ Guild of the Philippines, Anakbayan ngan League
of Filipino Students, an madagmit nga pagpapagawas kandra Sabado ngan duha pa niya nga kaupod.

Usa ka semana kahuman han nahitabo kandra Sabado, duha na liwat nga paraguma an ginmaltratar han pareho nga batalyon samtang nandadakop han baboy an duha ha Brgy. San Jose, Las Navas, Northern Samar. Ginkilala an mga biktima na hira Benerado O. Tuca Sr. ngan Allan Orsolino han Brgy. Epaw, Las Navas, Northern Samar. Iginhigot an duha ngan ginmaltratar ngan pirit nga ginpadara ha ira an mabubug-at nga bag han mga armado nga sundalo han AFP.

Ginkukundenar han mga grupo an padayon nga intimidasyon ngan harasment han militar, diri la ha kag-anak han mgabiktima, pati na liwat ha mga parag-uma, aktibista ngan mga human rights defender Gin-aaghat liwat nira an katawhan Pilipino labi na an mga taga-Samar nga magkaurusa para dumiri ha nagtikagrabe nga militarisasyon ha robinsya pinaagi han Memorandum Order No. 32#

No comments:

Post a Comment