28 October 2019

LARAB OKTUBRE 12, 2019 BALITA | BHB, ginpahimuwa nga mayda engkwentro ha Carigara

UTRO NGA GINPANHIMUWA han Efren Martires Command (EMC) an balita nga naperdi an Bagong Hukbong Bayan ha usa nga aragway ha Brgy. Caghalo, Carigara, Leyte hadton Oktubre 2. Syahan na nga ginbuksas han EMC an ginsesering nga engkwentro ha Calbayog City, Samar hadton Agosto.

Sering ni Ka Karlos Manuel, tagapagyakan han EMC, buwa an nasering nga aragway sanglit pataraw-an nga ginhatagan pa ni Gen. Lope Dagoy, kumander han 802nd Infantry Brigade han Philippine Army, han mga medalya an nadadabi nga 14 nga sundalo.

Ginhimo ini ni Dagoy agud tahuban an ira mga sala ha masa, sugad han pagpapalayas han han mga sundalo ha mga parag-uma ha Calubian hadton Disyembre ngan ha San Isidro hadton Pebrero kun diin nawara an ira panginabuhi.

Dugang pa, naghihimo han mga buwa nga agway an 8th Infantry Division han Philippine
Army agud tahuban an mga kaperdihan hini, labina tikang Agosto tubtub Septyembre kun diin diri mamenos ha 16 nga sundalo ngan ahente militar an namatay. Nagpasalida liwat han usa nga buwa nga ‘peace rally’ hi Dagoy para ipresentar an 1,200 nga inosente nga sibilyan komo mga ‘NPA surrenderers’ ha bungto han San Isidro.

Ginsiguro liwat ni Manuel nga pagbabaydon hira Dagoy ngan iya amo nga hi Duterte ha ira pagbinuwa ngan mga krimen. Sigon ha iya, mas magkukusog an suporta han masa ha gerra han katawhan para rumkon an nagtikagrabe nga paniniyupi ngan pananalumpigos han rehimen Duterte.

No comments:

Post a Comment