30 September 2019

LARAB Septyembre 21 BALITA | Alyansa kontra ha hiluagan nga importasyon han bugas, ginlansar



Gintukod hini nga Lunes an Bantay Bigas-Eastern Visayas, usa nga hiluag nga alyansa nga nana nawagan han pagbasura ha balaud para ha dugang nga importasyon han bugas ngan para ha pag pakusog han industriya han bugas ha Pilipinas.

Sigon kan Jun Berino, prinsipal nga convenor han Bantay Bigas-EV, durot han Rice Tariffication Law, papatayon han dugang nga liberalisa syon han importasyon han bugas an pakabuhi han mga lokal prodyuser han bugas. Tungod ini kay diri nira akos makigkumpitensya ha mas barato nga imported nga bugas nga naprodyus gamit an mas abante nga higamit ngan mas guti nga puhunan. Hini nga bulan, lumuros an presyo han humay ngadto ha P12 kada kilo tikang P18-20 kada kilo.

Nananawagan liwat an alyansa han kadagmitan nga ayuda para ha mga parag-uma nga nalugi tungod ha grabe nga El Nino nga nandestroso ha mga humayan ha rehiyon tikang pa han katapusan han 2018. Kulang o waray gud bulig nga ginpanhatag an mga lokal nga gubyerno ha mga naapektuhan nga parag-uma.

Sigon ha grupo, delikado an Rice Tarrification Law ha seguridad ha pagkaon ha rehiyon. Magreresulta liwat ini ha pagpapaserra han National Food Authority ngan hiluagan nga pagtanggal han mga empleyado hini.

Nagsaad an grupo nga aktibo hira nga mananawagan para ibasura an nasering nga balaud.

No comments:

Post a Comment